Околу една третина од вработените во Германија можат да замислат дека ќе продолжат да работат дури и откако ќе ги исполнат условите за старосна пензија, покажува истражувањето објавено викендов.
Во истражувањето на Институтот за германска економија (IW), меѓу 5.000 испитаници, вработените на возраст над 55 години се повеќе склони да размислуваат за работа дури и по возраста за пензионирање, пренесува германската новинска агенција (dpa).
На спротивната страна се оние од најмладата група на возраст до 30 години.
Понатаму, образованите и квалификуваните се повеќе склони да работат по пензионирањето отколку оние без квалификации и менаџерски одговорности.
Се разбира, размислувањето за останување на работното место по пензионирањето е исто така под влијание на околината, односно задоволните вработени имаат поголема веројатност да ја продолжат својата професионална кариера отколку незадоволните, покажува истражувањето.
Интересно е што финансискиот фактор не игра значајна улога кога се размислува за работа по пензионирањето.
Недостигот на работна сила мачи многу сектори на германската економија. Затоа, владата планира да воведе премија за оние кои сакаат да продолжат да работат по навршувањето на возраста за пензионирање.
Според планот, од 2025 година, секој што ќе продолжи да работи една година откако ќе ги исполни условите за старосна пензија, ќе ја добива таа премија, исплатена паушално кога конечно ќе се пензионира.
Станува збор за иницијатива на владиниот „план за раст“, за кој допрва треба да се расправа и да се гласа во Бундестагот.