Правилото за доселување за шест земји од Западен Балкан (Албанија, Босна и Херцеговина, Црна Гора, Косово, Северна Македонија и Србија) беше воведено на почетокот на 2016 година, меѓу другото, за да се спречи практиката со која жителите на тие земји се обидуваат да поминат низ системот за азил за да добијат работна дозвола во Германија.
Испадна дека е полн погодок: на заинтересираните им треба гаранција од работодавач во Германија, а предуслов е да немаат добиено социјални бенефиции во Германија како баратели на азил во последните 24 месеци од аплицирањето за работна виза.
Досега се планираше по ова правило годишно да се доселат 25.000 работници во Германија. Сега, според желбите на делови од германската влада, таа бројка треба да се зголеми на 50.000. Досега правилото беше ограничено на една година, па истекува на крајот на оваа година.
Западен Балкан да, Молдавија и Тунис не
Овој четврток, 27 април, Бундестагот првпат расправаше за предлогот за нов закон за имиграција со кој подобро би се регулирал приливот на работна сила. Правилото за Западен Балкан не е дел од новиот закон за имиграција, туку е дел од одредбата за која паралелно се разговара во редовите на социјалдемократската-зелено-либералната влада. Според информациите на ДВ, во четврток Министерството за труд треба да донесе одредба според која правилото за Западен Балкан се продолжува за една година, а контингентот се зголемува од сегашните 25.000 на 50.000 годишно.
Но, сега има отпор во власта кон тоа правило, кое би се спроведувало без новиот закон.
„Нашата цел треба да биде да ја направиме Германија привлечна за имигрантите до тој степен што правилата, како ова за Западен Балкан, ќе станат непотребни“, изјави за ДПА Мисбах Кан, политичар од Партијата на зелените задолжен за внатрешна политика.
Нејзиниот отпор, сепак, првенствено е насочен против идејата на некои делови од власта да воведат слични одредби врз основа на правилото за Западен Балкан што би важело за некои други земји надвор од Европската унија. Таму пред се се споменуваат Грузија, Молдавија и Тунис.
Владејачката Либерално-демократска партија (ФДП) особено се залага за проширување на одредбата во други земји. Претставникот на партијата за Западен Балкан, Томас Хакер, во изјава за ДВ го пофали правилото за Западен Балкан како „успешна приказна.
„Регулативата за Западен Балкан воведена во 2016 година е потврдена во пракса и овозможува постојниот недостиг на квалификувани работници во Германија значително да се ублажи со обучени и мотивирани експерти од Западен Балкан“, рече Хакер.
Истовремено, тој додаде дека се надева оти преку дигитализација наскоро ќе се надмине проблемот со долгото чекање во германските амбасади во земјите од Западен Балкан.
Тој, како и другите пратеници на ФДП, е за идејата одредбата да се прошири и во други земји.
„Во перспектива, би имало смисла да се прошири регулативата за Западен Балкан и на други земји, како Молдавија, каде што Германија исто така се смета за атрактивна земја за имиграција“, рече пратеникот на либералите.