Германската влада вети дека ќе ја поддржи мултинационалната корпорација за производство на челик ArcelorMittal со вкупно 1,3 милијарди евра за да помогне во намалувањето на емисиите на јаглерод од производството на челик во земјата, објави министерот за економија Роберт Хабек за време на посетата на градот Бремен во северна Германија. Парите ќе бидат искористени за изградба на електрични лачни печки во фабриките во сопственост на ArcelorMittal и во Бремен и во Ајзенхутенштад. Со електрична лачна печка, челикот може да се произведува со користење на обновлива енергија.
Плановите вклучуваат и зголемување на употребата на рециклирано старо железо. ArcelorMittal првично аплицираше за финансирање во 2021 година, а 1,3 милијарди евра се дел од поголемиот инвестициски пакет од 2,5 милијарди евра. Сепак, пред да се финализира инвестицијата, таа ќе треба да биде одобрена од ЕУ врз основа на правилата за државна помош.
„По долг период на евалуација од страна на властите, задоволни сме со оваа вест од федералната влада што можеме да го направиме следниот чекор кон климатско неутрално производство на челик во Германија“, рече Рајнер Блашек, извршен директор на ArcelorMittal Europe. Тој додаде дека доволното снабдување со обновлива енергија и зелен водород е следната пречка што треба да се надмине. До 2030 година компанијата планира да ги намали емисиите на јаглерод за 60 проценти.
По одлуката на уставниот суд која остави дупка во буџетот на германската влада, индустриите за челик и обновливи извори повикаа на „самит за трансформација“ во ноември за да се разјаснат итно потребните финансиски средства за декарбонизација на индустријата. Во декември, владата одобри 2,6 милијарди евра финансирање за производство на зелен челик во западната германска покраина Сар.