Германскиот хематолог Андреас Гринахер и неговиот тим од Универзитетот во Грифсвалд веруваат дека откриле што предизвикува формирање на згрутчување на крвта по вакцинирањето со некои вакцини против коронавирусот.
Гринахер и неговите колеги веруваат дека векторските вакцини што содржат аденовируси, безопасни вируси на настинка кои пренесуваат генетски материјал на примателите на вакцини против коронавирус, може да предизвикаат автоимун одговор што доведува до формирање на згрутчување на крвта.
Според професорот Гринахер, таа реакција може да биде поврзана со залутани протеини и конзервансот кој го пронашол во вакцината на „АстраЗенека“, пренесува Telegram.hr.
Германскиот тим штотуку започна со истражување на вакцината на „Џонсон и Џонсон“, но тие идентификуваа повеќе од 1.000 протеини во вакцината на „АстраЗенека“, добиени од човечки клетки, како и конзерванс познат како ЕДТА, етилендиаминтетраоцетна киселина.
Нивната хипотеза е дека ЕДТА, која се наоѓа во лекови и вакцини, им помага на протеините да влезат во крвотокот. Оваа киселина потоа се врзува за крвната компонента наречена тромбоцитен фактор 4, PF4, создавајќи комплекси кои го активираат производството на антитела.
Воспалението предизвикано од вакцините во комбинација со PF4 може да го измами имунолошкиот систем да поверува дека телото е заразено со бактерии. Според нивната теорија, тоа предизвикува архаичен одбранбен механизам што предизвикува згрутчување на крвта и крварење.
Тезата на хематологот Гринахер и неговиот тим е сè уште во фаза на истражување.