Србија со години се вооружува. Сега Косово сака да го следи тој пример. Веста дека САД ќе ѝ продадат на Приштина противтенковско оружје „Џавелин“ ја пренесуваат неколку германски медиуми – „Франкфуртер алгемајне цајтунг“ нешто поопширно.
Планираната продажба на американско противтенковско оружје на Косово ја налути српската влада, пишува германскиот весник.
Веста за ова е „големо разочарување“, изјави српскиот претседател Александар Вучиќ по средбата со американскиот амбасадор Кристофер Хил во Белград. Во четвртокот (11 јануари), Хил официјално го информираше Вучиќ дека барањето за Косово одобрено од Белата куќа е проследено до Конгресот.
Според информациите од Приштина и Вашингтон, Косово, меѓу другото, сака да купи околу 250 противтенковски оружја „Џавелин“ за Косовските безбедносни сили. Како што пренесува гореспоменатиот медиум, тој пакет вклучува и „испраќање инструктори за употреба и одржување на оние оружја што се покажале ефикасни против руските тенкови и другите оклопни возила во Украина. Од Приштина велат дека договорот за оружје е веќе договорен и дека имплементацијата е само формалност. Тие не очекуваат отпор од Конгресот“.
Според американското соопштение, продажбата „е во интерес на Соединетите Држави, бидејќи ќе ја зајакне одбранбената способност на европската партнерска држава. Продажбата ќе му овозможи на Косово да го задржи својот територијален интегритет“.
Неизвесност поради идната американска политика
Весникот пишува дека огромното мнозинство од населението на Косово со години е за влез во НАТО. Во исто време, се потсетува, „дека државноста на Косово не ја признаваат сите членки на Алијансата, вклучително и Шпанија и Романија“. Србија, која не го признава отцепувањето на Косово и која официјално продолжува да ја смета таа земја како нејзина привремено отцепена покраина, се надева дека ќе може трајно да го стави под своја контрола барем северот на Косово населен со Срби.
Во исто време, „на Западен Балкан, особено на Косово и во Босна и Херцеговина, постои неизвесност за идната американска политика во регионот, и тоа не само поради можната победа на Доналд Трамп на претседателските избори во САД. Ова е и затоа што Србија масовно ги подобри своите вооружени сили откако Вучиќ ја презеде власта во Белград. Вооружувањето е придружено со масовна реваншистичка реторика во провладините медиуми“.
Косово двојно го зголеми буџетот за одбрана
Како одговор, „соседите сега исто така ги зајакнуваат своите воени капацитети“. Косово, една од економски најслабите земји во Европа, оваа година планира да потроши повеќе од 200 милиони евра за одбрана. Неодамна, таа земја набави, меѓу другото, беспилотни летала Бајрактар од Турција. Косовскиот премиер Албин Курти се пофали дека го удвоил буџетот за одбрана во првите две години од својот мандат.
Од друга страна, се заклучува во текстот, „Вучиќ неодамна истакна дека српската војска е една од најсилните на Балканот. Тој укажа на големиот број тенкови кои неговата земја ги доби од Русија пред рускиот напад на Украина и најави дека Белград ќе продолжи да купува оружје, особено од Кина, особено борбени авиони, беспилотни летала и противвоздушни системи. Во Србија се планира и повторно воведување на задолжителниот воен рок, кој беше укинат во 2011 година“.