Проширувањето на ЕУ на Балканот е во централен интерес на блокот, изјави денес германскиот министер за надворешни работи Јохан Вадефул, цитиран од ДПА. Вадефул ги даде овие забелешки за време на посетата на црногорскиот главен град Подгорица.
По средбата со црногорскиот претседател Јаков Милатовиќ, премиерот Милојко Спајиќ и министерот за надворешни работи Ервин Ибрахимовиќ, Вадефул вети германска поддршка за Црна Гора на нејзиниот пат кон пристапување во ЕУ. Тој, исто така, ги повика кандидатите за ЕУ од регионот да ги надминат етничките тензии и да ги спроведат реформите потребни за пристапување.
„Силна и обединета Европска Унија дава најдобар придонес за безбедноста и просперитетот на граѓаните низ цела ЕУ“, рече Вадефул, цитиран од ДПА.
Вадефул го пофали „големиот напредок“ што го постигна Црна Гора во процесот на пристапување.
„Ако овие напори се зајакнат и ако Црна Гора не ослабне, тогаш овој пат може да биде успешен“, рече тој.
Црна Гора се стреми кон членство во ЕУ до 2028 година.
Ибрахимовиќ рече дека Црна Гора е сигурен партнер и додаде дека земјата ги поздравува германските инвестиции.
„Најатрактивниот сектор е обновливата енергија, но и германските туристи се добредојдени“, беше цитиран од ДПА.
Вадефул планира да се сретне со шефот на специјалното државно обвинителство на Албанија за борба против корупцијата, организираниот криминал и тероризмот, Алтин Думани, во Тирана подоцна денес.
Германија изрази загриженост за нивото на корупција и организиран криминал поврзани со меѓународната трговија со дрога во Албанија и другите земји во регионот. Планирани се и политички разговори.
Албанија, Босна и Херцеговина, Косово, Македонија, Црна Гора и Србија се стремат да се приклучат кон ЕУ, при што Црна Гора се смета за најнапредна на патот кон пристапување, иако сè уште не е одреден датум, потсетува ДПА.
ЕУ преговара за пристапување со Црна Гора од 2012 година, а со Србија од 2014 година. Процесот започна со Албанија и Македонија во 2022 година. Босна и Херцеговина е кандидат за пристапување, но преговорите сè уште не се започнати. Косово е потенцијален кандидат за пристапување.