Евроамбасадорот во земјава, Дејвид Гир денеска ги расчисти дилемите околу тоа дали С. Македонија официјално ги започна преговорите со ЕУ.
-Најпрво добра вест е што минатата недела ЕУ почна преговори за членство со С. Македонија и Албанија и ви ветувам дека дури и во изминатите месеци не бев сигурен дека ќе можам да го кажам тоа сега. Тоа се одлични вести, тоа е историски развој и за засегнатите земји, но и за ЕУ. Одбројувањето до влезот на вашата земја во ЕУ почна. Апсолутно ги започнавте преговорите и тоа е добра вест, рече категорично Гир во интервју за Канал 5.
Во однос на разликите во документите за С. Македонија и Албанија, Гир појасни дека е релативно нормално да има разлики меѓу секој пристапен процес во одреден степен.
-Преговарачката рамка за С. Македонија е одобрена од Европскиот Совет. Започнува првата етапа од скрининг процесот т.н. објаснувачки скрининг, кога Европската комисија заедно со С. Македонија го гледа процесот и идентификува што треба да се направи. Доброто е што веќе ЕУ започна подготвителен скрининг пред неколку години, кажа меѓу другото Гир.
Во однос на промената на македонскиот Устав и што доколку не се случи, евроамбасадорот нагласи дека тогаш најверојатното сценарио би било дека процесот ќе застане таму.
-Доколку промената на Уставот не се случи, јас би рекол дека најверојатното сценарио би било дека процесот едноставно ќе застане таму. Со други зборови, скринингот ќе продолжи до одредена точка и потоа ќе застане да ја чека државата, нагласи Гир.