Поддршката од Европската унија ќе се зголемува со тек на време, бидејќи пристапниот процес се однесува на спроведување реформи во многу области, вели евроамбасадорот Дејвид Гир.
На настан во Владата по повод буџетската поддршка од 80 милиони евра од ЕУ за справување со енергетската криза, Гир порача дека од клучна важност е поддршката за граѓаните и компаниите, како и за нови инвестиции.
На новинарско прашање колкава е достапноста на претпристапните фондови и колку средства има добиено државава, Гир посочи дека се нуди поддршка од околу 100 милиони евра на годишно ниво, вонредна помош за макрофинансиска поддршка, како и 80 милиони евра за енергетскиот пакет.
– Тука зборуваме отприлика за околу 100 милиони коишто покриваат многу сектори, таа поддршка ќе се зголемува со тек на времето затоа што, како што знаете, пристапниот процес се однесува на спроведување реформи во многу области, земјата се усогласува со законите и стандардите од ЕУ, од земјоделство до трговија, царина, владеење на право. На пример, за животната средина што е навистина скапа област, нашите инвестиции со тек на време ќе се зголемуваат како што земјата се приближува до ЕУ, за кога ќе се приклучи да има завршено поголем дел од тешката работа што е потребна за да се стане полноправна членка на ЕУ и да се искористат предностите од тоа, рече Гир.
Осумдесетте милиони евра што ги испорачува ЕУ, како што рече, се практична финансиска поддршка која ќе направи разлика во справувањето со кризата.
Опфатени ќе бидат најранливите категории, околу 172 000 луѓе, пензионери, самохрани родители, невработени кои имаат потреба од социјална заштита, 47 000 ранливи категории граѓани, 470 училишта, 67 јавни комунални претпријатија, компании од прехранбена индустрија, како и здравствени институции. Ова не се само бројки туку граѓани, компании и институции кои заслужуваат помош, на кои сите се потпираме и служат на интересите на сите, посочи Гир.
Поддршката од ЕУ е поткрепена со акциски план што треба да обезбеди одржливи реформи во енергетскиот сектор, а тоа, порача евроамбасадорот, мора целосно да се имплементира.
– Овие 80 милиони евра се само дел од еден поширок пакет што ЕУ го подготви за Западен Балкан. Голем дел од овие пари се веќе достапни за да се поддржат инвестициите во зелената енергетска транзиција која станува се поитна. Тоа е покрај парите што ЕУ ги обезбедува за енергетскиот сектор во оваа држава. Ова не се бројки, туку се луѓе, не се апстрактни обврски, туку практична помош за изградба на зелена иднина, тука, во регионот, и во ЕУ, затоа што енергијата не поврзува, затоа што сме семејство и сме уверени дека заедничката иднина лежи во Европската унија, порача Гир.