Новак Ѓоковиќ го победи домашниот претставник Лернер Тиен со 6:1, 7:6 (7:3), 6:2 на почетокот од последниот Гренд Слем турнир во сезоната, УС Опен, со што ја започна својата потрага по 25-та Гренд Слем титула. Сепак, Србинот има големи проблеми.
Победата на Новак Ѓоковиќ беше засенета од неговите здравствени проблеми за време на натпреварот. На самиот крај од вториот сет, Ѓоковиќ неколку пати покажа дека има одредени физички проблеми, па на крајот од сетот побара медицински тајм-аут. Се покажа дека станува збор за плускавец на десната нога, кој брзо беше саниран.
„Беше прилично чуден натпревар, да бидам искрен. Првиот сет траеше 20 минути, а вториот еден час и 20 минути, сосема спротивни сетови“, рече Ѓоковиќ по победата, откривајќи: „Почнав одлично, се чувствував навистина добро. А потоа, во вториот сет, бев навистина изненаден колку лошо се чувствував физички. Тоа ме загрижува. Немам никакви повреди, но многу се мачев да останам во долгите размени и да се опоравам по освоените бодови. Се надевам дека нема повторно да се чувствувам така бидејќи тоа ми го отежнува животот на теренот.“
И покрај сите проблеми, Србинот постави два нови импресивни рекорди.
Ѓоковиќ стана првиот играч во Опен ерата што победил во 75 последователни натпревари од првото коло на Гренд слем турнир. Тој, исто така, славеше 80-ти пат на легендарниот стадион „Артур Еш“ во Њујорк.