Откако суданските борци ја зазедоа Националната лабораторија за јавно здравје во суданскиот главен град Картум, Светската здравствена организација предупреди на „голем биолошки ризик“.
Лабораторијата инаку беше окупирана за време на примирјето на кое инсистираа Соединетите Американски Држави, првенствено за да можат странските земји да ги евакуираат своите граѓани од Судан.
Да потсетиме, на 15 април избувнаа борби меѓу суданските вооружени сили (САФ) и паравоените сили за брза поддршка (РСФ). Двете страни се согласија на 72-часовно примирје кое започна во вторникот по преговорите со посредство на САД и Саудиска Арабија.
Неименуван висок извор откри за Си-Ен-Ен дека борците од паравоените сили за брза поддршка (РСФ) заплениле лабораторија во која имало примероци од болеста и други биолошки материјали.
„Опасноста лежи во избувнувањето на каков било вооружен конфликт во лабораторијата, бидејќи тоа би ја претворило во микробна бомба“, рече тој.
Нима Садид Абид, претставник на СЗО во Судан, тврди дека таквиот развој на настаните е „исклучително опасен“ и дека постои огромен „биолошки ризик“. Споменатата лабораторија содржи изолирани примероци од детска парализа, мали сипаници и колера.
СЗО, исто така, откри за Си-Ен-Ен дека „лабораторискиот персонал повеќе нема пристап до лабораторијата“.
Тврдат и дека лабораторијата во неколку наврати останала без струја, што значи „дека веќе не може правилно да се управува со биолошкиот материјал складиран во лабораторијата за медицински цели“.