Иако „Tesla“ е сè уште меѓу најголемите производители на електрични автомобили во светот, нејзиното влијание на пазарот слабее од месец во месец. Ова е особено евидентно во Европа, каде што клиентите сè повеќе ги избираат конкурентите наместо застарената линија на „Tesla“.
На некои од најголемите европски пазари за електрични возила, клиентите масовно ја напуштаат „Tesla“, или затоа што не го одобруваат однесувањето на нејзиниот шеф Илон Маск или затоа што едноставно пронашле подобар автомобил од друг производител.
Причините се различни, но бројките се неоспорни. Во април, продажбата на „Tesla“ во Шведска падна за неверојатни 81 процент, што е најниско ниво од октомври 2022 година. Во Холандија е забележан пад од 73,8 проценти во споредба со истиот месец минатата година. Во Данска и Франција, бројките се намалија за 67 и 59 проценти, соодветно. Дури и во Португалија, каде што падот не беше толку остар, продажбата се намали за 33 проценти.
Сето ова се случува и покрај обидите на „Tesla“ да ја оживее својата позиција во Европа со лансирањето на обновениот „Model Y“. Електричниот кросовер е најпродаван модел на „Tesla“ со години и редовно е на врвот на европските топ листи. Но, дури ни редизајнот и техничките подобрувања не успеаја да го вратат интересот на европските купувачи.
Во првиот квартал од оваа година, продажбата на електрични возила во Европската Унија се зголеми за 23,9 проценти. Сепак, продажбата на „Tesla“ во истиот период се намали за 45 проценти, на само 36.167 возила, според податоците од Европската асоцијација на производители на автомобили (ACEA). Ова значи дека пазарниот удел на „Tesla“ во ЕУ падна од 2,4 проценти на 1,3 проценти.
На проширениот пазар на ЕУ, Обединетото Кралство и земјите од ЕФТА (Исланд, Лихтенштајн, Норвешка и Швајцарија), продажбата на „Tesla“ во првиот квартал се намали за 37,3 проценти, додека вкупната продажба на електрични возила се зголеми за 28 проценти.
Ситуацијата во САД исто така не е најдобра. Според „Кокс Аутомотив“, вкупната продажба на електрични возила во САД се зголемила за 11,4 проценти во првиот квартал, додека продажбата на „Tesla“ паднала за 8,6 проценти.
Падот во Европа доаѓа по особено слабата минатата година за „Tesla“, која ги забележа најниските испораки на возила за повеќе од две години – пад од 13 проценти на глобално ниво.
Големото прашање сега е: дали „Tesla“ може да се извлече од овој пад? Судејќи според интересот за прифатлив електричен пикап наречен Slate, многумина веруваат дека на Tesla итно ѝ е потребен долгонајавуван нискобуџетен модел. Компанијата наводно планира да претстави ново, попристапно електрично возило уште следниот месец. Но, сè уште не се знае точно што доаѓа. Некои извори шпекулираат дека би можел да биде поедноставен, помал Model Y, додека Маск се чини дека сака да продава роботакси без волан и со експериментален софтвер.