Google експериментира со многу идеи за тоа како полесно да се најдат квалитетни содржини во продавницата за апликации на интернет. Ако сте љубител на игрите веројатно ќе сакате да дознаете за нова функција на Google Play, која ви овозможува да тестирaте софтвер пред да сте го симнале. Оваа алатка се вика Google Play Instant и е дополнителен дел во продавницата каде што можете да најдете шест промотивни игри. Компанијата периодично ќе го ажурира каталогот достапен во овој дел.
Потребен е само еден клик, за да тестирате игра без да мора да ја купите или да ја преземете на паметниот телефон. Во моментов Google Play Instant нуди пристап до Clash Royale, Words with Friends 2, Final Fantasy XV: A New Empire, Solitaire, Bubble Witch 3 Saga и Mighty Battles, пренесоа CNet. Паралелно со тоа, компанијата ќе го промени целосно дизајнот на онлајн порталот и ќе додаде Arcade дел во кој ќе бидат прикажани видео трејлери на претстојните игри на водечките програмери.
Корисниците наскоро ќе почнат да ги гледаат ознаките „New“ или „Action“ што ќе им овозможат да ја откријат содржината на Google Play уште побрзо. Исто така, се работи на идејата за прикажување вести и видео клипови од YouTube поврзани со игри на Google Play. Тековните промени не се случајни, бидејќи игрите се најмногу симнати содржини од сопствениците на Android смартфони.
Способноста да се тестира игра пред да се симне на уредот има потенцијал да ги зголеми преземањата на Google Play.