Од стартот на календарската година, Преспанското езеро бележи раст од 14 сантиметри, па оттаму сега нивото е 842.36. Оваа информација, ја сподели градоначалникот на Ресен, Живко Гошаревски на својот фесјбук профил.
„Секторот за животна средина на Општина Ресен, по извршените мерења ме информира дека од почеток на оваа година нивото на Преспанско Езеро се зголеми за 14 см, односно, сегашното ниво е 842.36. Тоа е добра вест, во година кога треба и институционално да започнат голем број активности за спас на нашето езеро“, посочи Гошаревски.
Инаку, изминатиот месец, Преспанскиот регион го посети премиерот Зоран Заев кој соопшти дека Владата обезбедила првични 80 милиони денари за ревитализација на езерото, чие ниво беше многу намалено во однос на поросекот.
На 30 декември 2020 година, водостојот на Преспанското Езеро беше понизок за 1,52 метри во однос на повеќегодишниот просек за тој месец, со што за 50 сантиметри го имаше надминато апсолутниот минимум, покажаа мерењата направени од Управата за хидрометеоролошки работи (УХМР).