Грчката влада одлучи – засега – едноставно да го одложи третиот натпревар од финалето на плејофот помеѓу Панатинаикос и Олимпијакос, јавуваат медиумите во Атина.
Во истата одлука, заколнатите (не)спортски непријатели беа предупредени дека, доколку страстите не се смират веднаш и спортот не се врати во границите на фер-плејот, серијата нема да продолжи и Грција ќе остане без шампион во сезоната 2024/25.
Значи, сè укажува на суспендирање на првенството – државата засега го суспендираше финалето, се чека итен состанок на раководителите на Панатинаикос и Олимпијакос.
Сè укажува дека овогодинешното првенство се движи кон пауза. Грчката влада официјално објави дека третиот натпревар од финалната серија помеѓу Панатинаикос и Олимпијакос – се одложува. Министерот за образование Јанис Вруцис свика итен состанок за среда (5 јуни), на кој се поканети сопствениците на двата клуба – Димитрис Јанакопулос и браќата Ангелопулос.
Доколку не дадат јасни гаранции за продолжување на натпреварувањето под редовни услови, првенството ќе биде суспендирано – што во моментов е најверојатното сценарио.
Атмосферата е доведена до точка на вриење – можеби дури и без преседан во модерната историја на грчката кошарка. Судирите, тензиите и хаосот надвор од теренот ја доведоа лигата на работ на целосен колапс.
Владиниот портпарол Павлос Маринакис изјави: „Воведовме автоматски казни, ги заостривме кривичните санкции и ја направивме задолжителна употребата на камери и контроли на влезот. Сите натпревари досега се одиграа без инциденти – или санкциите беа строги, но фер. Каде што има волја и доследност – има резултати. Вчерашните сцени не се достојни за професионален спорт, особено кога станува збор за два клуба кои со години се на врвот на европската кошарка. Каде што има кривична или дисциплинска одговорност – законот ќе биде целосно спроведен.“
Маринакис потврди дека третиот натпревар од финалето е одложен, а итен состанок со раководителите на двата клуба во Министерството за образование е закажан за среда наутро.
„Доколку не дадат експлицитни гаранции дека ситуацијата ќе се смири – првенството ќе биде трајно суспендирано.“
Среда ќе биде ден на одлука, можеби најважниот во историјата на грчката клупска кошарка. Сите очи ќе бидат вперени во Јанакопулос и браќата Ангелопулос – нивната подготвеност да постигнат договор ќе одреди дали финалната серија ќе продолжи или сè ќе се распадне.