Грција денес ќе врати 5,287 милијарди евра европски кредити, доделени според Првиот меморандум со Еврозоната и Меѓународниот монетарен фонд (ММФ) во 2010 година на почетокот на грчката финансиска криза, објави државната телевизија ЕРТ.
Предвремената отплата ќе се случи со согласност на Европскиот механизам за стабилност (ЕСМ) и Европскиот фонд за финансиска стабилност (ЕФСФ).
Со цел побрзо намалување на државниот долг и заштеда на трошоците за камата (кредитите според првата шема за финансиска поддршка имаат флуктуирачка каматна стапка и доспеваат во периодот 2033-2041 година), Грција ја продолжува својата програма за предвремена отплата со средства од финансискиот бафер (т.н. „перница“), кој изнесува околу 45 милијарди евра.
Со денешната предвремена отплата, грчкиот државен буџет ќе биде ослободен од плаќања во вредност од 1,6 милијарди евра по 2026 година.
Главната цел на грчката влада е да ги отплати кредитите според меморандумите со доверителите за време на финансиската криза порано од наведениот датум, па дури и до 2031 година.
Поточно, Грција сака да отплати до 2031 година износ од 31,6 милијарди евра според првиот меморандум, кој е предвиден да се исплати во периодот 2029-2041 година.
Се очекува долгот на општата влада на Грција да изнесува 145,9 проценти од БДП на крајот на 2025 година, да падне на 138,2 проценти во 2026 година и да се намали под 120 проценти во 2029 година, приближувајќи се до нивоата на Франција.
Во периодот 2022-2024 година, Грција веќе предвремено отплати европски кредити во вредност од 15,9 милијарди евра, а со денешната исплата, износот на предвремено отплатени кредити на европските кредитори ќе достигне 20,1 милијарди. Покрај тоа, Грција предвремено отплати 7,9 милијарди евра од своите кредити кон ММФ, што доведе до отпис на нејзиниот долг кон фондот. Вкупно, Грција предвремено отплати околу 29 милијарди евра и заштеди 3,5 милијарди евра камата.