Грција ќе премести ракетна батерија „Патриот“ на југоисточниот егејски остров Карпатос како дел од напорите на земјата да ја зајакне одбраната од можни воздушни напади, еден ден откако беспилотно летало удри во британска воздухопловна база на Кипар, објави онлајн изданието на весникот „Катимерини“, повикувајќи се на државниот радиодифузер ЕРТ.
Одлуката доаѓа откако министерот за одбрана Никос Дендиас објави дека Грција испраќа две фрегати и четири борбени авиони Ф-16 на Кипар, поради растечките безбедносни загрижености на медитеранскиот остров. Атина, исто така, испрати воен транспортен авион Ц-130, кој слета преку ноќ во Пафос, југозападен Кипар, објавија кипарските медиуми.
Дендиас денес е во посета на Кипар заедно со началникот на вооружените сили Димитриос Хупис на состанок со кипарскиот претседател Никос Христодулидес и министерот за одбрана Василис Палмас за да се постигне подобра координација на позициите на двата сојузници.
Дрон „Шахед“ ја погоди британската база на кралските воздухопловни сили во Акротири, Кипар, кратко по полноќ во понеделникот, а неколку други напади со беспилотни летала беа успешно спречени во текот на денот, потсетува „Катимерини“.