Грчкото Министерство за развој постигна договор со сопствениците на супермаркети за намалување на цените на 1.000 артикли. Министерот Такис Теодорикакос изјави дека намалувањето на цените на основните производи ќе олесни на грчките семејни буџети.
Владата, исто така, бара од трговците на мало да го намалат својот профит со цел да го зголемат бројот на артикли со прилагодени цени во малопродажните синџири.
Списокот од 1.000 кодови на производи во супермаркетите чии цени ќе бидат намалени ќе биде достапен во првите две недели од октомври.
Во тек се разговори и со Здружението на производители за намалување на големопродажните цени, што ќе се одрази на конечната цена во продавниците.
Сегашната мерка ќе биде на сила најмалку до крајот на годината, но министерот Теодорикакос изрази уверување дека ќе биде продолжена и во следната година. Намалувањата на цените се „прашање на општествена одговорност“, рече министерот. Инфлацијата на храната во Грција е 1,4 проценти, додека во еврозоната е 3 проценти, според студијата на Министерството за развој.
Во сите објавени анкети, Грците се незадоволни од високите цени и нискиот животен стандард.