Грчката полиција уапси 38-годишен маж како дел од операцијата „Endgame“ на Европол за борба против меѓународниот сајбер криминал, објави Ројтерс.
Властите во Грција демонтираа инфраструктура на малициозен софтвер што инфицираше стотици илјади компјутери низ целиот свет, соопшти полицијата во соопштение.
Осомничениот, албански државјанин, беше уапсен во Атина на 3 ноември. Се верува дека е креаторот и продавачот на тројанецот за далечински пристап VenomRAT. Тој беше приведен врз основа на европска потерница издадена од Франција.
„Главниот осомничен зад софтверот за кражба на информации имал пристап до над 100.000 криптовалутни паричници што им припаѓале на жртвите, со потенцијална вредност од милиони евра“, се вели во соопштението на Европол.
Цената за користење на апликацијата за хакирање се движеше од 150 евра месечно до 1.550 евра годишно.
Европол соопшти дека последната фаза од операцијата „Endgame“ ги таргетирала крадците на податоци Rhadamanthys, тројанецот VenomRAT и ботнетот Elysium. Таа била спроведена во 10 земји, вклучувајќи ги и САД.
При претрес на домот на притворениот е пронајдена верзија од кодот на малициозниот софтвер, докази за администрирање на веб-страница што го нуди, сомнителни е-пошти и криптовалутни сметки.
Запленети се седум хард дискови, три флеш-драјвови и дигитален паричник што содржи криптовалута во вредност од 140.424 долари.