Жителите на Гренланд почнаа да ја бојкотираат американската стока во знак на протест против најавата на американскиот претседател Доналд Трамп дека островот ќе биде припоен кон САД, објави денеска локалната радио станица KNR.
– Парите на граѓаните ќе му дадат јасна слика на Доналд Трамп. Треба да им дадеме до знаење на Американците дека тоа што американскиот претседател го зборува за нашата земја е неприфатливо – изјави Миник Ланге, иницијатор на Фејсбук групата „Бојкотирај американски производи на Гренланд“.
– Направив страница за да го покажам мојот тивок бес поради изјавите на претседателот на Америка. И поради неговото непочитување кон Гренланд. Можеме да бидеме повнимателни за тоа што купуваме. Би можеле да купиме повеќе стоки од Европа или од Канада – рече тој.
Од основањето на страницата на 4 март, се пријавиле 1.700 членови.
Данска група со слично име, „Бојкотирам американски производи“, веќе има повеќе од 89.000 претплатници.