Посредувањето во воспоставувањето безбедна зона околу нуклеарната централа Запорожје во Украина, под руска контрола, станува сè потешко поради мешањето на војската во преговорите, изјави денеска шефот на агенцијата за нуклеарен мониторинг на ОН.
Во март, руските сили ја зазедоа најголемата нуклеарна централа во Европа, Запорожје. Електраната од советската ера беше изложена на оган неколку пати во последните месеци, што доведе до стравувања од нуклеарна катастрофа.
„Не верувам дека е невозможно, но тоа не се лесни преговори“, изјави главниот директор на Меѓународната агенција за атомска енергија (IAEA) Рафаел Гроси во интервју за италијанската јавна телевизија РАИ.
Гроси, кој претходно изјави дека се надева дека ќе постигне договор за заштита на централата пред крајот на 2022 година, рече дека преговорите со Киев и Москва станале покомплицирани бидејќи во нив се вклучени не само дипломати, туку и воени офицери.
„Преговарачката маса стана подолга и потешка“, рече Гроси.
Шефот на IAEA рече дека планира да се врати во Украина следната недела за да се сретне со претседателот Владимир Зеленски и други високи украински претставници, и се надева дека подоцна ќе отпатува за Москва.
„Рускиот претседател Владимир Путин во моментов не планира да се сретне со Гроси“, изјави портпаролот на Кремљ, Дмитриј Песков, пренесува „Интерфакс“.
Москва и Киев меѓусебно се обвинуваат за гранатирање на нуклеарната централа Запорожје.
„Си играат со оган. Нуклеарна несреќа не е во интерес на никого, дури ни на Русите“, изјави Гроси.