Поранешниот премиер Никола Груевски се огласи со реакција на денешната пресуда за случајот „ТНТ“, со која тој во отсуство е осуден на девет години затвор. Тој го поврза судскиот случај против него со недовршениот роман на Франц Кафка – “Процес”.
-Сличности со славното дело на Кафка постојат во речиси сите политички мотивирани прогони последните 5-6 години, произлезени од партиски контролираните обвинителства СЈО и ОЈО, наведува Груевски.
Според него, станува збор за апсурден политички прогон.
-Службениците во општина Гази Баба постапиле законски при носењето на одлуката за рушење на објектот Космос заради негово градење спротивно на добиената од општината градежна дозвола, потенцира поранешниот премиер кој е во бегство во Будимпешта.
Покрај него, затворски казни добија и поранешниот министер за транспорт и врски Миле Јанакиевски и поранешниот градоначалник на општина Гази Баба, Тони Трајковски. Јанакиевски доби 3 години затвор, а Трајковски 4-годишна затворска казна.