Соработката меѓу Црна Гора и Северна Македонија е пример за сите, како е можно да се негуваат и зачувуваат добрите односи, партнерство и соработка дури и во време на искушение, рече претседателот Мило Ѓукановиќ, кој денес го прими амбасадорот на Северна Македонија во Црна Гора, Михајло Трпкоски.
Како што соопшти Информативната служба на претседателот на Црна Гора, Ѓукановиќ изразил задоволство од средбата и можноста да ги посочи пријателските и партнерските односи меѓу двете земји, кои се карактеризираат со отворена соработка, континуирана размена на искуства и меѓународна промоција на заедничките вредности. Двете земји се веќе сојузници во НАТО, тие се соочуваат со предизвикот за влез во ЕУ и одговорноста за постигнување на таа заедничка цел, притоа зачувувајќи ја стабилноста и европската перспектива, рече тој.
Тој истакна дека Црна Гора внимателно ги следи настаните во Северна Македонија и уште еднаш им го честита членството во НАТО и минатогодишната одлука на Советот на ЕУ да ги отвори пристапните преговори со земјата, изразувајќи загриженост за забавувањето на процесот, но и убеден дека Северна Македонија ќе успее и ќе ја надмине блокадата на Бугарија, како што „тоа беше сторено со трпеливост и политичка мудрост преку договор со Грција“.
Како што беше објавено, Ѓукановиќ изрази високи оценки за поделената соработка на билатерално ниво, особено во областа на одбраната, надворешните работи и науката, а со добро ниво на економска соработка, тој изрази очекување за натамошно зајакнување на економските врски.
„Во тој контекст, тој истакна дека договорената возвратна посета на претседателот Пендаровски на Црна Гора во текот на оваа година ќе даде дополнителен поттик за ваквиот развој на настаните, за што особено се радуваме“, се додава во соопштението.
Имајќи ја предвид сложената епидемиолошка состојба во двете земји, Ѓукановиќ изрази надеж за поефикасна имунизација наскоро, што ќе создаде услови за побезбеден живот и поинтензивна меѓудржавна соработка.
Како што се наведува, амбасадорот Трпкоски му се заблагодари на Ѓукановиќ за приемот, потенцирајќи дека е привилегија да се извршува дипломатска должност во таква пријателска земја како Црна Гора.
„Тој му пренесе на претседателот Ѓукановиќ поздрави и целосна поддршка на претседателот Пендаровски за неговите активности, како и поддршка од македонската Влада и премиерот Заев, со очекување планираната посета да се реализира штом епидемиолошките услови бидат поволни, во заеднички интерес и за понатамошен развој на соработката. Тој ја потврди заложбата на Северна Македонија да биде доследна на европскиот пат преку дијалог и преговори, што ќе биде уште еден поттик за мирно решавање на проблемот и регионалната стабилност. Амбасадорот и се заблагодари на Црна Гора за нејзината целосна поддршка на неговата земја со решителност и понатаму да се продолжи зајакнувањето на односите меѓу двете земји“, се заклучува во соопштението.