Илкај Гундоган синоќа пристигна во Манчестер за да го финализира своето враќање во Сити, пренесе „Дејли Мејл“.
Германецот беше фотографиран од изданието, веднаш упатувајќи се кон каталонскиот ресторан на Пеп Гвардиола, каде што одржа состанок со него кој траеше околу 50 минути. Присутен беше и извршниот директор Феран Сориано.
Очекувањата се дека играчот од средниот ред ќе потпише договор на една сезона со опција за втора, а „граѓаните“ нема да платат трансфер во Барселона. Зделката најверојатно ќе биде официјално објавена денеска.
Гундоган беше првото ново засилување на Сити кога Гвардиола пристигна во 2016 година и ќе обезбеди дополнителна опција во средниот ред. За 7 сезони во тимот, тој забележа 304 натпревари, во кои постигна 60 гола и 38 асистенции.
Во однос на успехот, тоа беше дел од низата триумфи вклучувајќи 5 титули во Премиер лигата, Лигата на шампионите, 2 ФА Купа и 4 Лига купови. Тој беше капитен на тимот при освојувањето на извонредната тројна круна во 2023 година.