Гутереш на самитот на АСЕАН: Ризик од „голем колапс“ на светските системи

Генералниот секретар на ОН Антонио Гутереш на последниот ден од самитот на Асоцијацијата на нациите од Југоисточна Азија (АСЕАН) во Џакарта предупреди на опасност од фрагментација и „голем колапс“ на светските економски и финансиски системи.

Во говорот на самитот на АСЕАН, на кој присуствуваа САД, Кина, Јапонија и други земји, Гутереш ги повика светските лидери да најдат мирни и инклузивни решенија за предизвиците со кои се соочува светот, објави „Ројтерс“.

„Постои реална опасност од фрагментација – голем колапс на светските економски и финансиски системи, со различните стратегии во технологиите и вештачката интелигенција и конфликтни безбедносни рамки“, рече генералниот секретар на ОН.