Генералниот секретар на ОН Антонио Гутереш изрази загриженост дека Либан ќе стане „нова Газа“ поради зајакнувањето на вооружениот конфликт меѓу Израел и проиранската либанска шиитска организација Хезболах.
„Она што ме загрижува е можноста Либан да се претвори во нова Газа“, изјави Гутереш за Си-Ен-Ен на отворањето на годишната седница на Генералното собрание на ОН во Њујорк.
Во краткото интервју, Гутереш, кој неуморно се залага за смиреност на Блискиот Исток, исто така изрази жалење што по речиси една година војна во Појасот Газа меѓу Израел и палестинскиот Хамас, ниту една страна не сака „вистинско“ примирје.
„Јасно ми е дека двете страни не се заинтересирани за примирје. И тоа е трагедија бидејќи тоа е војна што треба да престане“, изјави тој за Си-Ен-Ен.
Тој додаде дека не може да се повтори доволно пати дека нема воено решение за да се осигура дека едната или другата страна е безбедна.