Пеп Гвардиола доби уште едно ласкаво признание во сезоната во која Манчестер Сити доминираше и ја освои англиската титула. Гвардиола неодамна ја доби и наградата за најдобар менаџер на годината доделена од Здружението на менаџери. Заедно со него, дефанзивецот на Сити, Рубен Дијаш беше прогласен за најдобар играч во елитното англиско натпреварување.
Под водство на Гвардиола, Сити постави рекорд по бројот на победи во низа минатата сезона. Помеѓу 3 јануари и 2 март 2021 година „граѓаните“ наредија 13 победи. Тоа беше исто така клучната серија преку која Сити ја обезбеди титулата шампион.
Сити исто така имаше серија од 21 триумф во сите натпреварувања помеѓу декември и март, како и 12 последователни победи на гости.
Заедно со Пеп, кандидати за најдобар менаџер беа Марсело Биелса од Лидс, Дејвид Мојс од Вест Хем, Брендан Роџерс од Лестер и Оле Гунар Солскјер од Јунајтед.
Рубен Дијаш беше највлијателниот дефанзивец во тимот на Сити минатата сезона. Ова е прва сезона на Португалецот во Англија по трансферот од Бенфика во септември минатата година. Тој беше платен 65 милиони евра и имаше 32 настапи за „граѓаните“ во Премиер лигата, а во нив Сити ја зачува мрежата 15 пати.
Со Рубен во тимот, Сити освои 23 натпревари во лигата. Други кандидати за титулата беа Кевин Де Бруин, Хари Кејн, Бруно Фернандеш, Мохамед Салах, Мејсон Маунт, Томаш Сучек и Џек Грилиш.