Бијонсе ја освои рекордната 32-ра награда Греми, додека Хари Стајлс ја освои наградата за албум на годината на овогодинешната церемонија во Лос Анџелес.
Бијонсе влезе во историјата како најодликувана уметница на Греми наградите, откако ја освои наградата за најдобар „денс/електронски албум“ за нејзиниот еуфоричен танцов опус „Renaissance“.
Со тоа таа го престигна унгарско-британскиот диригент Џорџ Солти, кој повеќе од 20 години го држеше рекордот на освоени 31 Греми.
„Се трудам да не бидам премногу емотивна“, рече ѕвездата по примањето на наградата.
Севкупно, Бијонсе освои четири награди на церемонијата – но уште еднаш ја пропушти главната награда – „Албум на годината“.
Оваа година, Хари Стајлс ја презеде круната, а гласачите на Греми го препознаа радио-пријателскиот поп на неговата трета плоча, „Harry’s House“.
Хари ја доби и наградата за најдобар поп албум на годината.