НЕОЧЕКУВАН херој на „Сантијаго Бернабеу“ вчера стана Хоселу, откако головите во 88. и 91. минута од натпреварот го свртеа резултатот на Реал Мадрид против Баерн и го одведоа неговиот тим во финалето на Лигата на шампионите. Тој влезе во игра во 81. минута и тоа веројатно веќе му беше исполнување на сонот, а она што следеше само му го разубави тој сон на играчот кој отсекогаш навивал за Реал и кој минатата година стана нивно привремено напаѓачко решение.
Хоселу игра во Реал како позајмен од Еспањол. Таа зделка го чинеше мадридскиот гигант 500.000 евра, а тој има опција да го откупи договорот за 1,5 милион. Титулите на Реал во 2014, 2016, 2017 и 2018 година Хоселу ги следел како голем навивач на клубот, а кога Реал пред две години го играше финалето на Лигата на шампионите во Париз против Ливерпул, тој беше на „Стад де Франс“ на трибините и го бодреше својот клуб во голема победа. Вчера го однесе во финалето.
Ова е негов втор мандат во клубот каде првпат пристигна како 19-годишник. Играше за вториот тим на Реал, а единствениот првенствен настап го имаше во победата од 8:1 против Алмерија. Жозе Мурињо тогаш му ги даде последните шест минути.
Сега приказната е поинаква, но останува да се види што ќе реши Реал на крајот од сезоната. Она што е јасно е дека ако Хоселу треба да остане, нема да остане под условите што ги има сега. Реал секоја недела за него одвојува само 48.000 евра бруто или 2,5 милиони евра бруто за оваа сезона. Со пласманот во финалето клубот заработи минимум нови 15,5 милиони евра, а во случај на победа на „Вембли“ ќе заработи најмалку 20 милиони.
За споредба, според податоците на „Капологија“, портал кој се занимава со финансиите во фудбалот, Реал најмногу годишно издвојува за Тони Крос (24,4 милиони евра бруто), Давид Алаба (22,5) и Лука Модриќ (21,9). Клубот издвојува помалку од Хоселу само за 19-годишниот Ник Паз, околу 7.700 евра неделно или 400.000 евра годишно.