Хрватскиот премиер Андреј Пленковиќ денеска учествуваше на виртуелен самит на Берлинскиот процес, на кој лидерите на земјите-членки разговараа за напредокот и актуелните предизвици на регионалната соработка во Југоисточна Европа, објави хрватската влада.
На состанокот, кој се одржа под претседателство на Германија, претседателите и владите на Берлинскиот процес разговараа за постигнувањата во седумгодишното постоење на таа дипломатска иницијатива, чија цел е да го приближи Западен Балкан кон европска интеграција, пренесе Хина.
Пленковиќ посочи дека Хрватска го поддржува продолжувањето на политиката на проширување, засновано врз индивидуалните заслуги на секоја земја, што беше утврдено и на самитот во Загреб за време на хрватското претседателство со Советот на ЕУ во мај 2020 година.
Тој ја истакна потребата за брзо постигнување консензус за преговарачките рамки за Албанија и Северна Македонија, за да можат веднаш да се отворат пристапните преговори, се вели во соопштението.
Премиерот особено ја истакна потребата од продолжување на европскиот пат на Босна и Херцеговина и спроведувањето на клучните реформи, особено постигнување договор за измени во Изборниот закон, со целосно почитување на принципот на легитимна застапеност на сите три конститутивни народи.
Истакна дека Хрватска го поздравува влегувањето во сила на Договорот за укинување на тарифите за роаминг на Западен Балкан на 1 јули како важно достигнување што ќе ја подобри дигиталната поврзаност на регионот.
Важно е да се обезбеди проток на стоки, луѓе, капитал и услуги помеѓу земјите од Западен Балкан, а Хрватска ги поздравува конкретните иницијативи во оваа насока.
Пленковиќ рече дека Хрватска, како израз на солидарност, донираше 360.000 дози вакцини на земјите од Југоисточна Европа.
Состанокот ја потврди важната улога на Берлинскиот процес како двигател на регионалната соработка на Западен Балкан, што е дополнително важно во контекст на надминување на социо-економските последици од пандемијата „ковид-19“.