Хрватското Министерство за одбрана објави дека според наредбата на тамошниот министер Иван Анушиќ, авион канадер (Canadair) со два екипажи е одобрен и се испраќа како помош за земјава при справување и гасење на пожарите кои беснеат на наша територија.
-Врз основа на наредбата на потпретседателот на Владата на Република Хрватска и министерот за одбрана Иван Анушиќ, авионот Canadair CL-415 од специјално организираните противпожарни сили со два екипажи е одобрен за Република Северна Македонија, со цел да обезбеди хуманитарна помош при гаснење пожари, стои во објавата на тамошното Министерство за одбрана.
Вчера претпладне од Турција пристигнаа два „ер трактори“ и еден хеликоптер, кои веќе активно работат на терен. Во текот на денешнио ден ќе пристигнат два хеликоптери од Словенија и по еден хеликоптер од Србија и од Црна Гора.
Пред два дена, македонската влада прогласи вонредна состојба на еден месец поради пожарите предизвикани од топлотниот бран што зафати поголем дел од Источна и Јужна Европа.
Во повеќето земји во регионот температурите надминаа 39 Целзиусови степени. Македонските пожарникари гасат 17 шумски пожари во суви и планински предели во централните и јужните делови на земјата.