Руската влада вклучи неколку материјали за електрооптичка опрема во списокот на стоки со двојна употреба што се забранети за извоз во „непријателските земји“. Одлуката е донесена за да се спречи нивната употреба во интерес на украинската армија, се вели во документот, цитиран од ТАСС.
Осум хемиски соединенија и материјали се забранети: литиум ниобат, цинк телурид, гадолиниум-галиум гранат, галиум арсенид, галиум фосфид, преработени и непреработени кварцни плочи и полирани призми од телуриум оксид, пренесе ТАСС.
Овие материјали, како што е наведено во објаснувачката белешка, „се исклучително барани во производството на електрооптичка опрема за воени цели (уреди за таргетирање, уреди за ноќно гледање итн.), што се користи, вклучително и од украинските вооружени сили во зоната на специјалната воена операција“.
Списокот на поединечни видови стоки што се забранети за извоз од Русија во непријателски земји е составен во март 2022 година и оттогаш е проширен многу пати. Забраната моментално е во сила до крајот на 2027 година.
Листата моментално содржи над 250 артикли – од двоглед до хеликоптери. Покрај стоките со двојна намена, забранет е и извозот на голем број обични материјали, вклучително и необработени дрвени материјали.
Листата на непријателски земји и територии на кои е забранет извозот на стоки ги вклучува САД, Украина, земјите од Европската Унија, Обединетото Кралство и нејзините контролирани територии, Австралија, Албанија, Андора, Бахамите, Исланд, Канада, Лихтенштајн, Микронезија, Монако, Нов Зеланд, Норвешка, Јужна Кореја, Сан Марино, Македонија, Сингапур, Тајван, Црна Гора, Швајцарија и Јапонија.