Наредната недела на собраниската комисија ќе расправаат за снимката на спикерот на законодавниот дом Талат Џафери.
Претседателот на Комисијата за мандатно-имунитетни работи, Панчо Минов изјавил дека пријавата од ВМРО-ДПМНЕ со доказите е примена и таа во рок од 7 дена ќе биде дистрибуирана до членовите на работното тело, по што веднаш ќе биде свикана седница.
Потпретседателот на Собранието, Горан Мисовски тврди дека Талат Џафери за него е еден од најдобрите претседатели што досега ги имало во Собранието.
-Не сакам да влијаам бидејќи е покрената постапка, но еве по трет пат ќе кажам Џафери е еден од најдобрите од независноста на Македонија. Знам дека секогаш имал одлична релација со службениците и собраниската служба. Ние со посебен закон ја одвоивме од Законот за администрација. Си имаме посебна служба, ги покачивме платите за над 20 проценти. Се друго е работа на политичка претставка, вели Мисовски одговарајќи на новинарско прашање.
ВМРО-ДПМНЕ поднесе барање до претседателот на собраниската Комисија за деловнички и етички кодекс, да свика седница на која ќе се расправа за аудио снимката на која се слуша како спикерот вика и навредува вработени во службите на Собранието.
-Оваа власт е стручна и вешта по однос на снимки и вештачења. Ако сметаат дека тоа треба да го направиме и дека тоа што го слушнавме не е точно, тогаш да го мериме гласот, фонијата на Џафери каков бил на телевизија, а каков во живо, па нека прават автентично толкување, изјави вчера пратеникот на ВМРО-ДПМНЕ, Антонио Милошоски одговарајќи на прашањето дали ќе има барање од власта за утврдување на автентичноста со контроверзната снимка.