Икањето се јавува поради многу причини, некои се физички, а некои емоционални.
Икањето обично е привремено, но во ретки случаи може да трае долго. Ова обично се случува поради оштетување или влошување на нервите поврзани со дијафрагмата, вели д-р Минеш Катри, вонреден професор на Медицинскиот факултет во Лонг Ајленд во Њујорк.
Еднаш е смешно, двапати е смешно, но се повеќе од тоа е напорно. Сите сме икале во нашите животи, но дали навистина знаете од каде доаѓаат тие чудни мали звуци без предупредување?
„Всушност, икањето започнува многу пониско во телото, почнувајќи од дијафрагмата, мускулот во облик на купола кој се наоѓа помеѓу белите дробови и стомакот. Нормално, дијафрагмата се повлекува надолу кога вдишувате за да го пушти воздухот во белите дробови, а потоа се опушта кога издишувате, така што воздухот може да ги напушти белите дробови и да излезе низ носот и устата“, објаснува д-р Катри.
Тој продолжува и вели дека „ако нешто ја иритира дијафрагмата, може да настанат грчеви, кои ќе ве принудат нагло да го вовлечете воздухот во грлото, каде што стигнува до говорниот систем“. Како што понатаму објаснува, „поради ова, гласните жици одеднаш се спојуваат и создаваат икачки звук“.
Зошто доаѓа до икање?
Икањето се јавува поради повеќе причини, некои физички, а некои емоционални, што на крајот доведува до иритација на нервот што го поврзува мозокот со дијафрагмата, пишува WebMD.
Некои вообичаени причини за икање се:
– прекумерна консумација на храна
– пребрзо јадење
– чувство на нервоза или возбуда
– консумација на газирани пијалоци или премногу алкохол
– стрес
– ненадејна промена на температурата
– голтање воздух додека џвакате гуми за џвакање
Како да го запрете икањето?
„Не сакам да ве разочарам ако се надевате дека ако имате пријател кој ќе ве исплаши, ќе престанете со икањето. Нема научен доказ дека тоа функционира. Сепак, некои експерти веруваат дека задржувањето на воздухот или дишењето во хартиена кеса може да биде корисно. Двете техники предизвикуваат акумулација на јаглерод диоксид во белите дробови, што ја опушта дијафрагмата“, вели д-р Катри.