Турската опозициска Републиканска народна партија (ЦХП) го номинираше градоначалникот на Истанбул, Екрем Имамоглу за кандидат на претседателските избори во 2028 година, и покрај неговото апсење, соопшти денеска партијата чиј член е Имамоглу.
ЦХП, главната опозициска сила во Турција, одржа внатрепартиски избори во неделата за да номинира претседателски кандидат.
Имамоглу, главниот противник на турскиот претседател Реџеп Таип Ердоган, беше единствениот кандидат на партијата.
Градоначалникот беше одведен во затворот Силиври, западно од Истанбул, во неделата, заедно со неколку други обвинети под обвинение за корупција.
Неодамнешното апсење на Имамоглу предизвика протести во Турција каде беа уапсени неколку стотици луѓе во девет градови.
Поддржувачите на опозицијата порачаа дека протестите ќе продолжат.