Интер Мајами официјално се огласи за иднината на Лионел Меси, чиј договор со клубот истекува на крајот од оваа 2025 година.
Соопштение објавено од американскиот клуб потврдува дека веќе се работи на негово обновување: „Лео има тековен договор до крајот на следната календарска година. Двете страни се заинтересирани за продолжување на соработката и веќе се преземени конкретни чекори во оваа насока“.
Соопштението доаѓа по извештаите во аргентинските медиуми дека Меси размислува да бара нов предизвик во поконкурентна лига во последните месеци пред Светското првенство во 2026 година. Според гласините, враќањето во Барселона би била негова претпочитана опција.
Во меѓувреме, „Скај Спортс“ исто така потврдува дека преговорите за продолжување на договорот веќе се започнати. Изданието нагласува дека двете страни се стремат кон договор што ќе обезбеди аргентинската ѕвезда да продолжи да биде централна фигура на клубот, вклучително и откако тимот ќе се пресели на новиот стадион „Мајами Фридом Парк“.
Пласманот на Интер Мајами во осминафиналето на Светското клупско првенство, каде што тимот беше елиминиран од поранешниот тим на Аргентинецот – Пари Сен Жермен, се смета за значајно достигнување кое даде дополнителен импулс на разговорите меѓу клубот и играчот. Според „Скај Спортс“, претставниците на Меси потврдиле дека официјалните преговори се во тек.
Лионел Меси, кој наполни 38 години на крајот на јуни, се приклучи на Интер Мајами во летото 2023 година. Оттогаш, тој одигра 63 натпревари со американскиот тим, во кои постигна 50 гола и запиша 24 асистенции.