Интерпол распиша потерница по Милан Радоичиќ, поранешниот потпретседател на Српската листа, поради настаните во Бањска, потврди министерот во косовската влада Ненад Рашиќ.
Тој додаде дека потерницата е издадена врз основа на барањето на министерството за внатрешни работи на Косово, преку УНМИК (Привремената административна мисија на Обединетите нации во Косово), бидејќи Косово не е членка на Интерпол, пишува Радио Слободна Европа (РСЕ).
Радоичиќ, инаку, ја презеде одговорноста за настаните во Бањска на 24 септември, кога беа убиени еден косовски полицаец и тројца Срби. Потоа поднесе и оставка од функцијата потпретседател на Српската листа, а преку својот адвокат ја извести јавноста дека стои зад настаните во Бањска, а за такви планови никого не информирал.
Радоичиќ беше приведен на 3 октомври во Белград под обвинение за „здружување за сторени кривични дела, недозволено изработување, држење, носење и тргување со огнено оружје и експлозивни материи и тешки кривични дела против општата безбедност“.
Тој беше ослободен еден ден подоцна со услов да не ја напушта Србија, а му беше забрането да замине на Косово.