Властите на Иран објавија дека започнале со сериско производство на домашна вакцина против коронавирусот, наречена „КОВИРАН Берекет“ и дека за неколку месеци ќе ги надминат проблемите поврзани со имунизацијата на населението во таа земја.
Вакцината развиена од ирански експерти е во третата фаза на тестирање, а во Техеран, во присуство на претставници на Научниот совет за борба против пандемијата, се спроведе вакцинација на волонтери.
Меѓу доброволците кои примиле иранска вакцина, биле Мина Мукриз, член на Националниот совет за борба против пандемијата, Хусеин Али Шехриари, парламентарец од Систан-Балучистан и поранешниот професор Мухамед Али Емирџергер.
Шефот на научниот совет на Иран, Мухамед Мухбир, рече дека еден милион дози вакцина од КОВИРАН Берекет ќе бидат произведени во мај, проследени со 3,5 милиони дози во јуни, 12 милиони дози во јули и 15 милиони дози во август.
„До септември ќе произведеме повеќе од 30 милиони дози од вакцината и ќе ги предадеме на Министерството за здравство на Иран. На тој начин, значително ќе го забрзаме процесот на имунизација “, рече Мухбир.
Иранската вакцина КОВИРАН Берекет за првпат беше тестирана на луѓе на крајот на декември минатата година, а иранските власти објавија дека тестовите биле успешни. Првата личност што доброволно ја прими иранската вакцина беше Таџибе Мухбир, ќерка на шефот на научниот совет на Иран, Мухбир.
Иранските експерти развија друга вакцина против коронавирус наречена „Рази Ков Парс“, која е во фаза на тестирање од крајот на февруари и досега е примена од 133 волонтери.