Иран ѝ испорачал на Русија голем број балистички ракети од типот земја-земја, јавија денеска британските медиуми, повикувајќи се на неименувани извори.
Тројца ирански извори изјавиле дека Иран ѝ испратил на Русија околу 400 балистички ракети со краток дострел, како што е „Золфагар“, ракета која може да погоди цели на одалеченост од 300 до 700 километри. Испораките почнале на почетокот на јануари, по состаноците од крајот на минатата година меѓу иранските и руските воени и безбедносни претставници одржани во Техеран и Москва, навел еден од иранските извори.
Некои проектили биле доставени до Русија со бродови преку Каспиското Море, додека други биле транспортирани со авиони.
„Ќе има повеќе пратки. Дозволено ни е да извезуваме оружје во која било земја што сакаме“, изјавил неименуван извор близок до иранската војска.
Ограничувањата на Советот за безбедност на ОН за иранскиот извоз на ракети, дронови и друга технологија истекоа во октомври.
Портпаролот за национална безбедност на Белата куќа, Џон Кирби, на почетокот на јануари изјави дека САД се загрижени поради тоа што Русија е блиску до набавка на балистичко оружје со краток дострел од Иран, покрај ракетите кои се веќе набавени од Северна Кореја.