ИТАЛИЈАНСКОТО Министерство за здравство ги забрани часовите по „јога со кученца“, велејќи дека на нив треба да учествуваат само возрасни кучиња за да се заштити здравјето на животните и безбедноста на учесниците.
Во соопштението од 29 април, Министерството рече дека е свесно дека организаторите често „позајмуваат“ кученца од одгледувачите. Но, бидејќи јогата со кученца ја „подобрува благосостојбата“, треба да се смета за еден вид „терапија со помош на животни“, која со закон може да ја практикуваат само возрасни животни, пишува Би-Би-Си.
„Папи јога“ обично вклучува кученца да се движат слободно за време на часот по јога и понекогаш да бидат вклучени во позите што ги изведуваат корисниците, а често часот по јога е проследен со игра со кученца. Министерството побара од регионалните власти да спроведат проверки за да се осигураат дека часовите по јога со кученца не се одржуваат.
Во соопштението, италијанскиот национален комитет за заштита на животните ја поздрави одлуката. Тој го цитираше експертот за кучиња Џуси Д’Анџело дека јогата со кученца е „физички и психички стресно искуство“ за животните. Таа исто така рече дека постои ризик учесниците да се занесат и да ги посвојат животните.
„Луѓето добиваат бран од емоции откако ќе ја доживеат удобноста да бидат во непосредна близина на кученце. Ова може да ги наведе да донесат одлука без навистина да размислуваат за импликациите и последиците“, рече Д’Анџело.
Таа исто така предупреди дека кучињата што се користат на часовите по јога често не се транспортираат безбедно, а организаторите понекогаш не им даваат доволно вода за пиење. „Овој вид активност е штетна за благосостојбата на кучињата и носи финансиска предност само за оние кои ги водат курсевите“, додаде таа.
Минатиот јули, британското Кралско друштво за спречување на суровост кон животните (RSPCA) ги повика луѓето да размислат за алтернативни активности за јогата со кутриња. Иако организаторите тврдат дека кутрињата уживаат во дружењето поврзано со древната индиска уметност, RSPCA тврди дека нема „ништо што би го сметале за корисно за овие животни“ во врска со јогата со кученца.