Игор Тудор моментално е под договор со Јувентус до крајот на Светското клупско првенство на ФИФА, кое ќе се одржи помеѓу средината на јуни и средината на јули.
Хрватскиот тренер го презеде гигантот од Торино во март, откако Тијаго Мота беше отпуштен поради лоши резултати, и успеа да го стабилизира тимот. Во девет натпревари, тој оствари пет победи, три нерешени и само еден пораз, обезбедувајќи го четвртото место во Серија А, кое носи директна квалификација во Лигата на шампионите.
Јувентус го планираше враќањето на Антонио Конте, кој му ја донесе титулата шампион на Италија на Наполи, во текот на пролетта, но 55-годишниот стратег одлучи да остане во Неапол. Џан Пјеро Гасперини исто така се споменуваше како можно решение, но тој одлучи да ја напушти Аталанта и да ја продолжи кариерата во Рома.
Во такви околности, Тудор повторно се најде во центарот на вниманието. „Ла Газета дело Спорт“ го нарече „најквалификуван кандидат“ да остане на клупата на Јувентус, а тој има и поддршка од раководството на клубот – според информациите објавени во понеделник, Тудор добил гаранција од Џон Елкан, извршен директор на „Ексор“, компанијата што го поседува клубот. Елкан наводно му рекол да ги игнорира медиумските шпекулации и да остане фокусиран на својата работа.
Договорот на Тудор беше автоматски продолжен до летото 2026 година благодарение на квалификацијата во Лигата на шампионите, но Јувентус сè уште има можност да ја раскине соработката ова лето, со исплата на отштета од околу еден милион евра.