Италијанското обвинителство во Милано отвори истрага против 80-годишен италијански државјанин, осомничен за вмешаност во таканаречениот „снајперски туризам“ за време на опсадата на Сараево во 1990-тите години.
Станува збор за поранешен возач на камион кој живее во околината на северниот италијански град Порденоне, а кој е првото лице официјално идентификувано во истрагата што започна во ноември 2025 година. Осомничениот ќе биде сослушан од обвинителите в понеделник, додека засега останува на слобода.
За време на претресот на неговиот дом, карабињерите пронашле седум легално поседувани парчиња оружје, меѓу кои два пиштоли и четири пушки. Италијанскиот весник Il Fatto Quotidiano објави дека сведоци тврдат оти осомничениот претходно се фалел со учество во таканаречен „човечки сафари“ за време на војната во Босна и Херцеговина.
Идентитетот на осомничениот, според италијанските медиуми, е Џузепе Венијадуцо, 80-годишен жител на селото Саворњан, во близина на Сан Вито ал Таљамента.
Тој се товари по повеќе точки за убиство со умисла, со отежнителна околност – ниски мотиви. Извори блиски до истрагата наведуваат дека сè уште не е утврдено дали лично учествувал во снајперски напади или имал улога во логистиката и транспортот на другите учесници. Сослушувањето е закажано за 9 февруари.
За време на опсадата на Сараево, околу 11.000 цивили загинаа како последица на снајперски оган и артилериски напади од позиции на армијата на босанските Срби распоредени на ридовите околу градот, потсетуваат новинските агенции.
Истрагата во Италија беше покрената по пријава на новинарот и писател Ецио Гавацени, кој започнал да го истражува случајот откако го гледал документарниот филм Сараево Сафари на словенечкиот режисер Миран Жупаниќ.
Гавацени тврди дека богати странци плаќале високи суми за да учествуваат во организирани снајперски екскурзии, претставени како „туристички рути“ до борбените позиции со поглед кон Сараево. Според неговите наводи, Италијанците се собирале во Трст, потоа патувале во Белград, од каде со придружба на војници на босанските Срби биле носени до линиите околу опколениот град.
Италијанската истрага се оценува како прва можност за формална правна постапка против лица осомничени за вакви практики, кои досега главно беа предмет на историски анализи и новинарски истражувања. Нејзиното отворање, според медиумите, им дава надеж на преживеаните дека одговорните за убиствата на цивили конечно би можеле да одговараат пред суд.