Натпреварите со висок ризик во италијанското првенство веќе нема да се играат во вечерните часови од следната сезона, одлучи италијанското Министерство за внатрешни работи, како одговор на насилството што го придружуваше неделното римско дерби.
„Во текот на сезоната 2025/26, веќе нема да биде дозволено да се започнуваат натпревари со висок ризик во вечерните часови, како што беше случај со натпреварот меѓу Лацио и Рома“, се наведува во соопштението на Министерството за внатрешни работи испратено до Италијанската фудбалска федерација (ФИГЦ).
Според италијанските новински агенции АНСА и АГИ, Министерството исто така им забранило на навивачите на Лацио и АС Рома да присуствуваат на следните три гостински натпревари на нивните тимови.
Овие одлуки доаѓаат по жестоките судири меѓу „ултрасите“ на двата римски клуба и полицијата, пред одигрувањето на дербито кое заврши нерешено (1:1). Пред почетокот на натпреварот, околу 500 навивачи на Лацио и Рома се обиделе да ги пробијат полициските бариери поставени околу Олимпискиот стадион, со цел да се спречат директни судири меѓу двете навивачки групи.
Полицијата го спречила налетот на „ултрасите“, од кои дел биле вооружени со метални шипки и чекани, користејќи водени топови. Во судирите биле повредени 24 лица, а биле уапсени тројца навивачи на Лацио и тројца на Рома, на кои подоцна им беше забранет влез на стадионите.