Легендарниот хрватски тенисер и стручњак, Горан Иванишевиќ зборуваше за време на „Вимблдон“ за проблемите со кои се соочуваат сè повеќе тенисери, а тие се од психолошка природа.
Иванишевиќ, кој пристигна на Вимблдон како тренер на Стефанос Циципас, вели дека скоро сите тенисери се на антидепресиви и се во лоша форма.
Хрватскиот ас нагласува дека проблемот со консумирањето антидепресиви кај тенисерите се зголемува. Тој не разбира зошто тие вршат толку голем притисок врз себе што им предизвикува дополнителни проблеми.
„Кога разговарам со играчите, сите се на антидепресиви. Зверев ми рече дека е во лоша форма. Не знам зошто играчите си наметнуваат толку голем притисок врз себе. Можеби се работи за надворешни очекувања, очекувања на општеството. Тие едноставно не можат да го поднесат тоа“, рече Иванишевиќ во интервју за списанието „Клеј“.
Иванишевиќ, исто така, вели дека неговиот клиент, Циципас „прво мора да ги среди работите надвор од теренот“, за да се врати на врвот на тениската турнеја.
Српскиот тенисерНовак Ѓоковиќ претходно се осврна на истата тема, тврдејќи дека социјалните медиуми се една од причините за расположението на тенисероите.
„Социјалните медиуми се исклучително присутни и во голема мера го диктираат расположението и дневниот ритам на спортистите. Секој е таму и може да се изгуби или премногу да се врзе за коментари, за нешто што некој ќе го напише на тастатурата, а тоа боли. Не е тривијално, тоа е нешто за кое мора сериозно да разговараме“, изјави Ѓоковиќ за „Спорт Клуб“.