Ние бевме изненадени кога се донесе Законот за легализација на бесправно изградените објекти, заради тоа што во Собранието имаше многу добра дебата за Националната стратегија за борба против корупцијата и во долет за градежништво и урбанизам токму го наведовме ризикот од постоење на овој Закон и препорачавме што побрзо да се ограничи неговата примена, вели во Утрински брифинг претседателката на ДКСК, Билјана Ивановска.
Таа вели дека ДКСК предлага да се повлече актуелниот Предлог закон за легализација на бесправно изградените објекти, да се направи попис и категоризација на дивоградбите за да се утврди нивниот точен број, па потоа да се изработи ново законско решение во кое точно ќе се прецизира кој и каков објект, како и каде и под кој услови ќе може да се легализира.
-Ние сме Државна комисија за превенција и нашата превентивна улога е токму таа – во насока на таа улога и ја отворивме оваа дебата. Ние бевме изненадени кога се донесе овој Закон, заради тоа што во Собранието имаше многу добра дебата за Националната стратегија за борба против корупцијата и во долет за градежништво и урбанизам токму го наведовме ризикот од постоење на овој Закон и препорачавме што побрзо да се ограничи неговата примена. Сега пратениците кои ја поддржаа стратегијата потоа го изгласаа овој Закон. Бевме изненадени и веднаш изреагиравме, со тоа што кажавме дека ќе го изанализираме Законот и ќе доставиме иницијатива до Уставниот суд, па а се провери дали тој Закон е усогласен со Уставот. Сега Законот е вратен во собраниска процедура и оценуваме дека сега е поволен момент да се слушне професионалната јавност во Македонија. Од тие причини ја организиравме дебатата и сме многу задоволни. На дебатата покрај претставници на стручната фела учествуваа членовите на ДКСК, луѓе од невладините организации, од министерствата за транспорт и врски и за животна средина и просторно планирање и ЗЕЛС, како и правни експерти од областа на судството и високото образование, судии. Од самата дискусија се утврди дека тој Закон не е усогласен со Уставот, заради тоа што не овозможува владеење на правото ниту пак ја заштитува животната средина, изјави во Утрински брифинг претседателката на ДКСК, Билјана Ивановска.
Таа смета дека овој закон ја покрива слабост на инспекциските служби.
-Ние гледаме дека со овој Закон на една страна сите оние граѓани кои што имале дозвола за градба, ги почитувале сите процедури, си платиле комуналии, сега тие стануваат граѓани од втор ред, затоа што сите оние кои што граделе бесправно, па дури што им се започнати постапките, ќе им се стават настрана значи бесправото станува правно. Јас сметам дека со ваков Закон ние ја покриваме целата слабост на инспекциските служби. Дали општината немала инспектор, дали бил со несоодветно образование, дали тој затаил, дали дал решение за рушење па не се спровело, не е важно, важно не се спровело како што треба. Имаше и добри предлози – дека постои проблем – постои, дека треба да се реши, треба да се реши, но прашањето е како. На тоа прашање имаше добри предлози од фелата. Се кажа дека треба да се направат критериуми, да се направи инвентаризација, секоја општина со какви дивоградби располага, вели Ивановска.