Владејачката албанска социјалистичка партија на премиерот Еди Рама освои малку повеќе гласови на парламентарните избори од опозициската Демократска партија на Љуљзим Баша, покажуваат резултатите врз основа на излезна анкета.
Според излезната анкета спроведена за порталот „Еуроњуз Албанија“, социјалистите на Рама, кои се на власт веќе осум години, освоија околу 44 проценти од гласовите, а демократите на Баша околу 42 проценти од гласовите.
Право на глас имаа околу 3,6 милиони луѓе, избирајќи 140 пратеници.
Дванаесет партии или коалиции се кандидираа за функции.
Изборната комисија објави дека изборниот процес поминал „мирно, безбедно и со интегритет“ и дека победникот ќе биде познат за 48 часа.
Денешните избори ги следат бројни набљудувачи на ОБСЕ и западните амбасади.
Изборите се сметаат за пресвртница за евроинтеграцијата на Албанија, која сè уште чека на отворање на пристапните преговори со Европската унија.
Тие беа одржани во време на пандемија на коронавирусот, остри обвинувања од страна на опозицијата за корупција на врвот на владата и остро ривалство меѓу двете најголеми политички партии во земјата.