Израел ќе го промени текстот на песната со која има намера да се натпреварува на Евровизија за да елиминира секој политички елемент и да го гарантира своето учество, објави во неделата Израелската радиодифузна корпорација (КАН).
Откако првично се закани дека ќе се повлече од конкурсот доколку израелската песна не биде прифатена како што е, КАН на крајот објави дека на крајот се согласиле со мислењето на израелскиот претседател Исак Херцог, кој ги „предложи потребните прилагодувања“.
„КАН контактираше со текстописците на двете избрани песни, „Октомвриски дожд“, која беше избрана за прва и „Танц засекогаш“, која беше втора, барајќи од нив да го адаптираат текстот со зачувување на уметничката слобода“, соопштуваат од корпорацијата.
„Октомвриски дожд“ не го споменува експлицитно крвавиот напад што Хамас го изврши на југот на Израел на 7 октомври, но според израелските медиуми и независните набљудувачи, текстот на песната не остава простор за сомнеж.
„Танцуваме во бура/Немаме што да криеме/Однеси ме дома/Остави го светот зад себе/И ветувам дека никогаш повеќе нема да се повтори/Уште сум мокра од овој октомвриски дожд“, е текстот на песната.
По добивањето на изменетите текстови, јавната радио и телевизија ќе „одбере песна за испраќање“ до организаторите „за да можат да го одобрат учеството на Израел на натпреварот“, додаде КАН.
До 10 март ќе се знае која песна е избрана.
Израелско-руската пејачка Еден Голан (20) треба да ја претставува Израел на овогодинешниот натпревар кој ќе се одржи во мај во Малме, Шведска.
Неколку земји ги повикаа организаторите да му забранат на Израел да учествува на Изборот за песна на Евровизија во знак на протест против огромните жртви во војната во Појасот Газа.
Израел е првата неевропска земја на која и е дозволено да учествува на Изборот за песна на Евровизија во 1973 година. Израелците победија четири пати.