Откако претседателот на Франција, Емануел Макрон, вчера објави дека Франција официјално ќе ја признае Палестина на Генералното собрание на ОН во септември, остри критики стигнаа од Израел и од САД, јавуваат светските новински агенции.
Макрон намерите на Париз ги објави на социјалните мрежи, споделувајќи го писмото до палестинскиот претседател Махмуд Абас во кој ја потврдува таквата намера. Макрон изрази надеж дека ваквиот чекор на Франција ќе доведе до мир на Блискиот Исток.
„Итен приоритет денес е да се стави крај на војната во Газа и да се предизвика олеснување на цивилното население. Мирот е можен“, напиша, меѓу другото, францускиот претседател.
Consistent with its historic commitment to a just and lasting peace in the Middle East, I have decided that France will recognize the State of Palestine.
I will make this solemn announcement before the United Nations General Assembly this coming September.… pic.twitter.com/VTSVGVH41I
— Emmanuel Macron (@EmmanuelMacron) July 24, 2025
Израелскиот премиер Бенјамин Нетанјаху изјави дека ваквото решение го „влошува теророт“ и претставува егзистенцијална закана“, создавајќи „трамболина за уништување“ на Израел.
Министерот за надворешни работи на Израел, Гидеон Саар рече дека „палестинската држава ќе биде држава на Хамас“.
Државниот секретар на САД, Марко Рубио, го нарече планот на Макрон да ја признае палестинската држава како „неразумно решение“.
Во меѓувреме, САД ги прекинаа преговорите за примирје во Газа и ја повлекоа својата делегација од Доха, Катар, поради „отсуството на желба за напредок од страна на Хамас“.