Израелскиот воен аналитичар Амос Харел рече дека „предавањето“ на Хамас пред тековната копнена инвазија на Појасот Газа воопшто не е опција.
Во написот објавен во вторникот во израелскиот весник Haaretz, Амос Харел се осврна на прашањето за жестоките борби во Газа и смртните случаи во редовите на израелската армија.
Тој, исто така, рече дека Израел се уште е далеку од тоа да го порази Хамас, додавајќи дека лидерот на движењето, Јахја Синвар, нема намера да издава наредби на своите луѓе да престанат да се борат.
Иако призна дека израелската армија трпи загуби и дека „предавањето“ на Хамас е малку веројатно, израелскиот воен аналитичар смета дека силата што ја користи армијата, преку распоредувањето на три борбени тимови во Газа и огромната штета што тие ја предизвикуваат, носи плодови.
Долгорочни последици
Харел го привлече вниманието на фактот дека израелската армија во одредени ситуации се соочила со жесток отпор од борците на Хамас, но смета дека тие тешко можат да одолеат на израелскиот воен притисок во западниот дел на градот Газа и неговите северни предградија.
Тој рече дека Хамас ќе се обиде да постигне договор за размена на затвореници, што ќе го претстави како стратешка победа.
Според израелскиот аналитичар, армијата овој пат добила одобрение за голема копнена операција без оглед на стравувањата на политичарите од неуспех и загуби. Во врска со појавата на меѓународен притисок врз Израел за прекин на војната, тој изјави дека израелските офицери во Газа сметаат дека „операцијата треба да заврши дури откако Хамас ќе биде поразен“.
Кога станува збор за уништувањето предизвикано за време на израелската инвазија, Харел рече дека отстранувањето на последиците од тоа уништување може да потрае со години.