Болница во Барселона соопшти дека извршила револуционерна трансплантација на лице, прва во светот во која донаторката доброволно го донирала своето лице пред да биде подложена на постапка на потпомогнато умирање, објави Ројтерс. Сложениот зафат бил изведен во престижната Vall d’Hebron во текот на есента 2025 година, а точниот датум не е соопштен поради заштита на приватноста.
Нова шанса за пациентката
Пациентката, претставена само како Карме, страдала од некроза на ткивото на лицето, предизвикана од бактериска инфекција по убод од инсект. Состојбата сериозно ѝ ги отежнувала говорот, исхраната и видот. На прес-конференција во понеделникот таа изјави дека закрепнува многу добро.
„Кога дома се погледнувам во огледало, ми се чини дека повторно почнувам да личам на себеси“, изјави Карме. За вакви интервенции, кои вклучуваат трансплантација на лице, неопходно е донаторот и примателот да бидат од ист пол, со иста крвна група и со слична големина на главата.
Сложен зафат и единствена донаторка
Операцијата вклучувала трансплантација на сложено ткиво од централниот дел на лицето, а во неа учествувале околу сто експерти, меѓу кои психијатри и имунолози. Координаторката за трансплантации во болницата, Елизабет Навас, изјави дека донаторката покажала „зрелост која остава без зборови“.
„Некој што одлучил да го заврши својот живот да посвети една од своите последни желби на целосен странец и да му подари ваква втора шанса, тоа е навистина неверојатно“, истакна Навас.
Шпанија како предводник
Шпанија, со население од 49,4 милиони жители, веќе повеќе од три децении е глобален лидер во трансплантациите на органи. Во 2021 година таа стана четвртата земја во Европската унија што ја легализираше еутаназијата. Според владини податоци, во 2024 година 426 лица примиле помош при умирање.
Половина од шесте трансплантации на лице досега изведени во Шпанија ги реализирал тимот на болницата Vall d’Hebron. Истата болница во 2010 година ја изведе и првата целосна трансплантација на лице во светот. Минатата година во Шпанија биле извршени околу 6.300 трансплантации на органи, при што најчести биле трансплантациите на бубрег, покажуваат податоците на Министерството за здравство.