Одредени кандидати се максимално фаворизирани земајќи големи средства. Кога ќе поделиме, ќе видиме дека потписот на граѓанинот кој го дал за нив вреди 97,5 евра, а потписот за нас вреди 12,6 евра. И сега треба да зборуваме за фер и демократски избори? Еве и тоа ќе го голтнеме, рече кандидатот за претседател Стевче Јакимовски при денешната прес-конференција во ДИК, каде што се потпиша Кодексот за фер и демократски избори.
Според лидерот на ГРОМ, неприфатливо е што се откажале мастер дебатите меѓу претседателските кандидати. Јакимовски жали што на локални избори има три дебати за водоводи и паркови, а да нема ниту една дебата за битни државни прашања.
-Кодексот ќе го почитувам, но ако немаме дебати, нема да го потпишам, кажа Јакимовски, додавајќи:
-Ги гледате сите овие камери. Со 126 илјади евра што да им поделам на овие луѓе? Барем да можам со сопствени средства да платам. До тука работата не е фер и не е демократска. Јас на локалните избори имав нула средства за реклами, но имавме дебати. Сега со вакви минимални средства и без дебати, тоа не е во интерес на граѓаните.
Градоначалникот на Карпош побара од претседателот Стево Пендаровски да вети дека ќе организира мастер дебати.